- 43 -

1385. Oktober 9 - 25.

In nomine Christi amen. Cum pridem coram nobis Nicolao de Friberg canonico Lubucensi et officiali Wratislaviensi inter venerabilem et religiosos viros abbatem et conventum monasterii in Ruda ordinis Cisterciensis et nomine monasterii ipsorum predicti actores ex una, Et Nicolaum Groschil, Ioannem Flikebir magistros carnificum, Matthiam Kobuwiczer, Henselinum Volkil, Catherinam Laurentii, Heynil Stenczil, Ioannem Bart, Miczkonem Glywicz, Closelium Renczkin et Nicolaum Grobchin, Heinricum Beyr, Cucurul, Petrum Kindirmacher, Ioannem Kindirmacher, Simonem Craczconis, Georgium Craczconis, Laurentium Walkacz, Nicolaum Bule, Dorotheam Relictam Siffridi, Dominicum Czeyp, Ioannem Loyczman, Ioannem Wyntir, Martinum Grosse, Martinum Wuchirchin, Martinum Hoyptchin, Matthiam Petirman, Matthiam der Kninne, Nicolaum Beme, Nyczconem Fleyscher, Matthiam Apth, Conradum Fleyscher, Selige Nolcze Aluschani relictam Nyczkonis (sic), Fridericum de Koslauia, Nicolaum Gedenke, Ioannem Ryner, Matthiam Kozuch et Thomam, carnifices in Ratibor manentes reos parte ex altera super infrascripto libello exorta fuisset materia questionis, cuius libelli tenor sequitur sub hac forma. Coram vobis honorabili viro domino Nicolao de Friberg canonico Lubucensi et officiali Wratislaviensi proponit procurator et syndicus nomine procuratorio et syndicatus venerabilis et religiosorum virorum abbatis et conventus monasterii in Ruda ordinis Cisterciensis nomine dicti sui monasterii contra Nicolaum Groschil, Ioannem Flickebir magistros carnificum, Matthiam Kobuwiczer, Hensil Volkil (etc, ut supra omnia nomina) et Thomam carnifices in Ratibor, et contra personam quamcunque pro ipsis intervenientem in iudicio et dicit cum querela, quod quamquam abbas et conventus supradicti et antecessores eorum nomine monasterii fuerunt et esse consueverunt in possessione plena et pacifica percipiendi, tollendi, recipiendi, exigendi et habendi annis singulis octo marcas grossorum pecunie usualis census annui in terminis subscriptis videlicet die dominica infra octavas Corporis Christi duas marcas, in festo b. Laurentii proxime sequenti duas marcas, in festo beati Galli duas marcas ac in festo Purificationis beate Virginis duas marcas in et de fartorio sive curia macellorum dicti oppidi Ratibor in et de et a censu carnificum predictorum, qui vulgariter kuttilczins nuncupatur, ac a dictis carnificibus et ab ipsorum antecessoribus carnificibus in Ratibor, salva duntaxat subscripta spoliatione, tamen predicti carnifices de anno presenti videlicet 1384 in terminis prescriptis dictis abbati et conventui seu ipsorum predicto monasterio censum predictum octo marcarum dare et solvere denegarunt, ipsosque abbatem et conventum, necnon monasterium ipsorum supradictum possessione census huiusmodi spoliaverunt et spoliant hodieque detinent spoliatos indebite et iniuste. Quare petit dictus procurator et syndicus nomine procuratorio et syndicatus quorum supra per vos et vestram definitivam sententiam pronunciari. decerni et declarari abbatem et conventum sepedictos cum suis antecessoribus nomine dicti monasterii sui fuisse in possessione pacifica et quieta, censum octo marcarum predictum in terminis suprascriptis percipiendi, tollendi et habendi in et a dicto fartorio sive curia macellorum nec non censu kuttilczins dicto, ac ab ipsis carnificibus ac ipsorum antecessoribus suprascripta spoliatione duntaxat excepta, ipsosque carnifices de anno supradicto abbatem et conventum ac ipsorum monasterium sepedictos, possessione census huiusmodi spoliasse et spoliare hodieque detinere spoliatos, et ob hoc abbatem et conventum et eorum monasterium antedictos, ad possessionem pristinam dicti census restituendos et reintegrandos fore, et per vos restitui et reintegrari, et nihilominus eosdem carnifices ad dationem prestationem et solutionem octo marcarum ratione census persessi et solvere neglecti necnon ad solutionem dicti census in antea annis singulis in predictis terminis abbati et conventui ac monasterio predictis faciendam teneri et astringi, condemnandos et compellendos fore, condemnari etiam et compelli vestra definitiva sententia mediante cum expensis iam factis, de faciendis protestans, et alias in et de premissis fieri iustitie complementum.
Contra quem quidem libellum fuit pro parte dictorum reorum in scriptis exceptum, replicatione in scriptis subsecuta, super quibus interloquendo diximus libello predicto fore respondendum, exceptione non obstante. Lite quoque postmodum ad prescriptum libellum verbo et negative legitime contestata, Iuramento calumnie hinc et inde subsecuto, tandem nonnullis positionibus et articulis pro parte dictorum actorum oblatis et productis et factis responsionibus per dictos principales divisim et successive ad quamlibet personaliter ad easdem, demum super articulis negatis nonnullis testibus et quadam litera ad probandum inductis, quibus testibus et litera rite receptis examinatis et ipsorum dictis sive attestationibus solemniter publicatis, postremo tam contra dicta sive attestationes testium, quam contra literam fuit per partem aduersam in scriptis exceptum, replicatione et duplicatione contra literam subsecutis, tandem exceptio contra testes et ipsorum dicta oblata, in ea parte in qua saperet factum ad probandum in scriptis admitti petebatur, contra quam petitionem fuit per partem adversam in scriptis exceptum, replicatione legitime subsecuta; demum interloquendo exceptionem, in quantum saperet factum, repulimus a probando et consequenter syndico et procuratoribus dictarum partium in causa concludi petentibus, nos cum eisdem conclusimus in causa et habuimus pro conclusa, diem quoque nobis hodiernam ad sententiam definitivam proferendam duximus pro termino statuendam. Visis igitur actis in presenti causa coram nobis actitatis et productis diligenter ipsisque rite recensitis ac equa iustitie lance discussis, deliberatione quoque nobiscum super premissis prehabita diligenti, per ea que vidimus et cognovimus et nunc cognoscimus et videmus, procuratoribus et syndico partium predictarum coram nobis constitutis, et sententiam definitivam a nobis ferri petentibus hinc et inde: Christi igitur nomine primitus invocato pro tribunali sedentes et eundem solum pre oculis habentes pronunciamus decernimus et declaramus abbatem et conventum supradictos cum suis successoribus nomine dicti monasterii sui fuisse in possessione pacifica et quieta, censum octo marcarum predictum in terminis suprascriptis percipiendi, tollendi et habendi in et a dicto fartorio sive curia macellorum, nec non censu vulgariter Kottelczins dicto, ac ab ipsis carnificibus ipsorumque antecessoribus, subscripta spoliatione duntaxat excepta, ipsosque carnifices de anno supradicto abbatem et conventum et ipsorum monasterium supradictos possessione huiusmodi spoliasse et spoliare hodieque tenere spoliatos. Et ob hoc abbatem et conventum et eorum monasterium antedictos ad possessionem pristinam dicti census restituendos et reintegrandos fore. Quos etiam quantum in nobis est in Christi nomine restituimus et reintegramus. Et nihilominus eosdem carnifices, videlicet Nicolaum Groschil, Ioannem Elickebir, magistros carnificum, Matthiam Kowuwiczer, Henselinum Volkil (etc. omnes ut supra) et Thomam ad dationem prestationem et solutionem octo marcarum ratione census persessi et solvere neglecti, nec non ad solutionem dicti census in antea annis singulis in predictis terminis abbati et conventui ac monasterio predictis faciendam teneri et astringi, condemnandos et compellendos fore, quos etiam quantum in nobis est condemnamus et compellimus definitive et finaliter in his scriptis, condemnantes nihilominus predictos carnifices memoratis abbati et conventui ac monasterio in moderatis litis expensis, quas etiam postmodum ad novem marcas grossorum Pragensium, Juramento tamen a syndico et procuratore dictorum actorum prerecepto quod tantum in presenti causa expendit alias non expensurus, previa moderatione taxavimus presentibus et taxamus. Lecta lata et in scriptis pronunciata est hec nostra definitiva sententia per nos Nicolaum de Friberg canonicum et officialem prefatum in consistorio nostro Wratislaviensi hora tertiarum lune die nona, sed expense declarate lune die vicesima tertia, taxate vero Mercurii die vicesima quinta mensis Octobris hora et loco predictis sub anno domini 1385 presentibus discretis viris Erasmo de Wolavia, Joanne Bryger de magna Glogovia, Petro Adolfi de Goldberg, Nicolao Taczaw, dominis magistris et advocatis, Martino Petirwicz, Petro de Brega, procuratoribus, Matthia de Goldberg et Laurentio Walch notariis publicis consistorii nostri Wratislaviensis predicti testibus ad premissa In cuius rei fidem et testimonium omnium premissorum presentem nostram definitivam sententiam sigilli nostri appensione ac subscriptione notarii nostri infrascripti fecimus communiri.
Locus signi et sigilli ac subscriptionis notarii.

Mitgetheilt von Herrn Dr. Potthast aus dem Diplomatar des Abtes Andreas Emanuel von 1653. Einige offenbare Fehler sind nach der Analogie ahnlicher Urkunden verbessert.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 2, Urkunden der Klöster Rauden und Himmelwitz, der Dominicaner und Dominicanerinnen in der Stadt Ratibor. Hrsg von dr. W. Wattenbach, Breslau 1859.